Seu de Roda d'Isabana
A Ilesia parroquial de Sant Bizent mártir de Roda ye una antiga Seu romanica aragonesa situata en o lugar de Roda d'Isabana, Ribagorza (Uesca). Ye conoixita como a Seu de Roda d'Isabana encara que dende 1851 ya no ye seu bispal. Ye o lugar más chicot d'España con una seu.
A ilesia autual ye d'os sieglos XI y XII, encara que enduró reformas importants en o sieglo XVIII, cuan se construyó o portico sur y a torre que destaca en ixa frontera. En 1924 ye estada declarada Molimento Nazional.
Contenius |
Istoria
Fue fundata por Remón II, Conde de Ribagorza. A primer notizia que se tiene d'a Seu de Roda ye a d'a suya consagrazión, l'1 d'abiento de 956, cuan se debantó a diozesis de Roda. Manimenos, ixe templo l'arrasoron as tropas d'Abdalmalik en 1006. Seguntes as restas arquiolochicas, yera un edifizio de tres naus trestalladas en 5 tramos.[1]
A nueba construzión, mandada por Sancho o Mayor, fue consagrada de nuebas por o bispe Arnulfo ta par de 1030, y fue adedicada ta os santos paleocristians Bizent y Balero. A reconstruzión s'enzetó en o estilo romanico lombardo, anque en as embueltas de Sancho o Mayor o procheuto se modificó, y os mayestros d'obras nabarros alportoron una nueba conzezión d'a obra, relazionada con o Camín de Santiago. O procheuto orichinal contemplaba un edifizio de tres naus con una cabezera triple d'absides semizerculars.
En o reinau de Sancho Remíriz se remató a construzión, en terminar a cabezera y se debantó una torre en o costau sur. Á prenzipios d'o sieglo XII s'alzoron as tres naus y se construyoron criptas en os absides, ta o que fue menister elebar o sulero. A portalada, que se troba en o muro sur, ye d'o sieglo XIII, anque ye cubillada baixo un portico moderno.
En o costau norte se i achunta o claustro y a capiella de Sant Agustín, de nau unica y abside semizercular. Muito dimpués, ya en o sieglo XVIII se construye o portico sur y a torre autual.
Una comunidat agustina l'abitó dica 1757. En 1787 a suya condizión de seu fue rebaixada ta colechiata, con o ran de concatedral sufraganea de Leida, y dimpués ta ilesia parroquial con o ran d'arziprestau, estando güe una ilesia parroquial pertenexient t'a Diozesis de Balbastro-Monzón.[2]
Descripzión
En a suya frontera esterior a cabezera presenta arquiellos ziegos y bandas berticals (lesenas), motibos decoratibos carauteristicos d'a arquiteutura romanica lombarda.[3] En l'alzau se beye a presenzia d'as criptas. L'abside norte fue sustituyiu por un otro barroco.
As naus se trestallan por meyo de pilonas cruziformes en as que escansan as bueltas d'ariesta d'as naus laterals y a buelta de cañón apuntau d'a nau zentral. O sulero presenta libels diferents por a presenzia d'una tribuna, os aczesos t'a cripta y a presenzia d'a cripta en a cabezera.
O cubrimiento d'os absides se fa con bueltas de cañón apuntadas en o presbiterio, y bueltas de cuarto d'esfera en a nau zentral que, encara que zaboyada por o retablo barroco, encara se puede beyer si se rodía este.
Debaixo d'a cabezera se troba tres criptas en libels diferents. A cripta zentral, u Cripta de Sant Remón (porque astí bi ye apedecau Sant Remón, bispe muerto en 1126), ye a más compleixa y ampla, con tres naus con cabezera semizercular. A cripta de l'abside sur s'ha escubierto rezientment, y a d'o costau norte, conoixida como Archibo y Sala d'o Trasoro, tiene pinturas murals romanicas.[4]
En o costau norte bi ye o claustro, de planta trapezoidal y arcos de meyo punto sobre os que escansa un tellau que aboca l'augua ta l'interior, en un alchub que replega l'augua d'a plebia. Arredol d'este se destribuyen as dependenzias d'a seu: a Sala capetular y o Refectorio, antiparte d'una capiella dita de Sant Agustín. Esta cambra, de planta rectangular y abside semizercular ye decorada con pintura mural.
Referenzias
- ↑ Equipo de Redacción CAI100. Las Catedrales de Aragón. Caja de Ahorros de la Inmaculada de Aragón. ISBN:84-95306-45-X.
- ↑ Equipo de Redacción CAI100. Las Catedrales de Aragón. Caja de Ahorros de la Inmaculada de Aragón. ISBN:84-95306-45-X.
- ↑ Motibos decoratibos en a Seu de Sant Bizent de Roda.
- ↑ Pinturas murals romanicas en Seu de Sant Bizent de Roda de Isabana.
Binclos esternos
|
|
 |
|---|---|
|
Basilica d'o Pilar | Nuestra Siñora d'a Güerta de Tarazona | O Salbador d'Albarrazín | O Salbador de Zaragoza | San Bizén de Roda de Isabana | San Per de Chaca | Santa María de Tergüel | Santa María de Uesca | Santa María de l'Asunzión de Balbastro | Santa María d'o Romeral de Monzón |
|
stock | retire | vm
Why are we here?
All text is available under the terms of the GNU Free Documentation License
This page is cache of Wikipedia. History